23 - 27 xuño 2025
TEATRO PRINCIPAL
O cinema foi, e segue a ser, un ámbito de expresión artística, mais tamén un lugar para narrar e representar o mundo. O colectivo LGBTIQA+ sempre atopou na sétima arte un espazo de complicidade e liberdade para crear referentes, amosar que outros mundos, diversos e disidentes, tamén son posibles.
AMBIENTA nace con vontade de amosar a mellor produción audiovisual, tanto no ámbito galego como a nivel internacional, da realidade LGBTIQA+. Unha mostra que busca reivindicar un cinema de calidade que tamén recolla as vidas, os seres e os sentires de todas, todos e todes. Xorde para poñer as lentes do arco da vella e seguir construíndo unha sociedade onde a diversidade sexa un dos valores fundamentais e un lugar de encontro, cultura e socialización arredor do cinema.
ACTO DE INAUGURACIÓN de AMBIENTA + DELIRIO SKETCHS. Presentación delirante a cargo de MERCEDES PEZÓN (Javier Sánchez "Meiga-i") + HIGH PAW + Tamy (Laura Merchán) + Psicóloga Susana (Cata Ukelele) + e posterior coloquio coa directora, Bea Saiáns
OCAÑA, RETRAT INTERMITENT, de Ventura Pons
LE BLEU DU CAFTAN, de Maryam Touzani
MARILIENDRE, de Javier Ferreiro + Encontro de Javier Ferreiro con Mariona Borrull
CURTAS: BIG BOYS DON´T CRY, de Arnaud Delmarie; SOLO KIM, de Javier Prieto de Paula e Diego Herrero; THREE, de Amie Song
Desde Ambienta hai un claro compromiso por dar a coñecer as producións audiovisuais galegas, os proxectos queer do país que apostan por amosar as distintas realidades da comunidade LGBTIQA+. Este ano, unha vez máis, a creación galega abre a programación desta semana de cinema diverso en Pontevedra. Colabora coa escolla Avante LGBT+ Pontevedra.
Mostra algúns dos filmes máis importantes do panorama internacional que foron aclamados polo público e a crítica. Unha selección de creacións audiovisuais contemporáneas que reflicten a realidade LGBTIQA+ en distintas partes do mundo e distintos contextos sociais, políticos e culturais. Nesta edición, contamos coa colaboración da mostra AMAL EN RUTA, un proxecto da Fundación Araguaney-Puente de Culturas para dar visibilidade ao cinema árabe.
Recupera títulos importantes que nos axudan a descubrir a presenza do colectivo LGBTIQA+ na historia do cinema e como foi a representación do mesmo ao longo do tempo a través da sétima arte en distintas partes do mundo. Unha forma de contribuír á memoria queer a través do relato fílmico. As películas desta sección son seleccionadas por Cineclube Pontevedra.
As series audiovisuais son un dos medios de expresión con máis éxito do mundo audiovisual na actualidade e, sen dúbida, dos preferidos do público. O mundo das series está a ser un auténtico espazo de liberdade para a realidade queer, por iso teñen un lugar moi especial na programación de Ambienta. Nesta edición contamos coa colaboración para a selección dos Premios Feroz, aproveitando sinerxías cos prestixiosos galardóns que se entregarán tamén en Pontevedra na vindeira edición de 2026.
Achega as distintas realidades do colectivo LGBTIQA+ nun formato reducido que esperta grande interese por parte do público, con historias narradas en menos de 30 minutos. Un crisol de puntos de vista que dá conta da diversidade dentro do propio colectivo, seleccionados, unha vez máis, polo noso festival amigo FIC Bueu.
Lin, unha muller chinesa de marcadas crenzas relixiosas, múdase aos Estados Unidos para vivir coa súa filla Jane e a parella desta, Briana. Lin fai novas amizades na Igrexa e teme que o día do seu aniversario as súas amigas descubran a relación lésbica da súa filla.
Esta curtametraxe foi estreada na última edición do Festival de Cine de Cannes.
Kim é un adolescente trans. Aínda que o anhela, non foi quen de saír do armario e amosar a súa verdadeira identidade. Quizais porque está só nun país ao que emigrou ilegalmente. Ou quizais (sobre todo?) por medo a perder a única conexión emocional que ten co mundo: Camila, unha nena que coida a diario.
A historia acontece durante un verán abrasador nunha pequena aldea preto de Marsella. Despois dunha ausencia de tres anos, Lucas e o seu grupo de amigos reciben de volta o seu mellor amigo Hicham. Este ansiado regreso esperta rapidamente emocións conflitivas na banda, pero sobre todo, novas esperanzas en Lucas.
A vida cotiá de Meri Román, unha antiga diva da escena gay madrileña, vese perturbada pola morte do seu pai, que a reconecta con vellos amigos do colectivo. Xuntes rememoran o pasado a través da música e das lembranzas mentres Meri busca a maneira de fuxir da súa monotonía e esgotadora vida da actualidade para atopar, canda as súas amizades, as bases da súa identidade. Mariliendre é unha recentísima produción dirixida polo galego Javier Ferreiro e producida por Suma Content, proxecto de Javier Calvo e Javier Ambrossi. Unha serie musical protagonizada por Blanca Martínez, Martin Urrutia e Omar Ayuso.
Conta a historia dun matrimonio, Halim e Mina, que rexentan unha tenda de caftáns na medina de Salé, Marrocos. A parella sempre viviu cun segredo que Halim aprendeu a ocultar, a súa homosexualidade; pero a enfermidade de Mina e a chegada dun mozo aprendiz á tenda ameazan con alterar o equilibrio que foran construíndo ao longo dos anos. Le Bleu du caftan (en árabe القفطان الأزرق) estreouse na sección “Un certain regard” do Festival de Cine de Cannes e foi galardoada na categoría mellor actriz (Lubna Azabal) na 67 edición da Seminci. Foi, así mesmo, candidata por Marrocos aos Premios Oscar.
Un filme icónico dentro da historia do cine LGBTIQA+ español, que formou parte da Sección Panorama no Festival de Berlín en 1978 e na Sección Oficial no Festival de Cannes (1978). O filme documental afonda na vida e figura do senlleiro pintor e travestí andaluz José Pérez Ocaña e amosa o seu modo de vida alternativo, así como os seus peculiares puntos de vista sobre a relixión, os fetiches, nun retrato da Barcelona dos inicios da transición, onde viviu. O filme reflicte unha Barcelona homosexual e travestí nun momento no que a Lei de perigosidade social estaba aínda vixente para reprimir e condenar toda disidencia sexual.
Un proxecto audiovisual dirixido por Bea Saiáns e producido por CRU & Cimbalino Filmes.
A webserie Delirio Sketchs confórmana tres capítulos independentes, cargados de humor, nos que se abordan, desde o surrealismo, os grandes temas que preocupan á xuventude: o clima, a identidade, o ínfimos que somos no universo. Con coreografías, cancións, reportaxes e cameos estelares da cultura cuir underground galega, os múltiples sketchs mesturan linguaxes (TV, artes performativas e cinema) e funcionan como espellos dun calidoscopio que apunta á realidade. Esta iniciativa levou o premio a mellor proxecto 2024 – Festival Carballo Interplay.
Pascal filma unha banda xuvenil nun skatepark e, no entanto, nace unha atracción mutua entre el e Joel.
Seducido polo encanto do rapaz, convídao á súa casa co pretexto de “editar a película”. Xa alí, Pascal cuestiona a súa decisión ao decatarse de que Joel ten só dezaseis anos e xórdenlle unha chea de dúbidas.
Cooper Josephine loita co seu proceso de transición. Na súa procura de identidade, enfróntase ás expectativas da familia e aos prexuízos sociais ao longo dun camiño certo cara a si mesma.
Xoana pasa o verán cunhas amigas. Entre elas está Emma, unha rapaza coa que comeza a explorar algo máis ca unha amizade. Porén, Xoana nunca tivo relacións sexuais, e a idea de dar ese paso xéralle medo e inseguridade. Os seus pensamentos, cargados de dúbidas e temores, difi cultan o avance da súa relación con Emma.
Iván é un home trans que traballa como carretilleiro nos almacéns duns invernadoiros no sur de Europa. Contra todo prognóstico, namórase de Hadoum, unha compañeira hispanomarroquí da cinta de envasado. A contracorrente, vivirán o seu amor entre invernadoiros e praias, xa que nin a familia de Iván nin a de Hadoum están a favor desa relación.
IVÁN & HADOUM tivo a súa estrea mundial na sección Panorama da Berlinale, onde gañou o Teddy Award; a súa estrea estatal no Festival de Málaga, onde acadou a Biznaga de Prata Premio Especial do Xurado, a Biznaga de Prata ao Mellor Guión e a Mención Especial ao Mellor Actor (Silver Chicón), e estivo presente no Festival D’A de Barcelona.
*TEDDY AWARD, premio de cine queer máis destacado do mundo, na Berlinale (2026).
Festival de Cine de Málaga (2026):
Biznaga de Prata ao Mellor Guión (Ian de la Rosa).
Biznaga de Prata ao Premio Especial do Xurado.
Mención Especial do Xurado a Mellor Interpretación Masculina (Silver Chicón).
9 LUNAS é unha comedia feel good que narra a historia de Ángel, un novo e atractivo adestrador persoal ao que a vida lle sorrí. Após dun ano sabático, acaba de ser contratado polo mellor ximnasio da cidade, e todo parece ir sobre rodas. Pero o seu mundo dá un xiro cando comeza a atoparse mal, acode ao hospital e recibe unha noticia inesperada: está embarazado. E é que, en realidade, Ángel é un home trans ao que só lle faltaba un último paso para completar a súa transición e agora deberá enfrontarse a unha decisión que porá a proba a súa identidade, os seus soños e a maneira en que entende a súa propia masculinidade.
Unha proposta audiovisual que vai dar moito que falar e que pensar, remover conciencias, celebrar novas realidades e sacarnos da nosa zona de confort.
Adela é unha muller de carácter conservador e respectada na súa comunidade. Vive nunha pequena vila en compañía da súa asistenta, Isabelita, con quen mantén un vínculo especial. Logo de propoñérenlle matrimonio e de viaxar a Madrid para unha consulta médica, Adela decide facerlles fronte a certas pantasmas que a acompañan desde hai tempo e que lle devolven unha imaxe que se resiste en recoñecer. Ante a idea insoportable de volver á súa vila, Adela múdase a Madrid para comezar unha nova vida cunha nova identidade.
Un fantástico momento para revisitar en pantalla grande este filme clásico, agora que se vén de estrear unha nova versión producida por Javier Calvo e Javier Ambrossi, con guión de Alana S. Portero e dirixida por Fernando González Molina.
*Nomeada a Mellor Película de Fala non Inglesa nos Oscar (1973).
Mellor Actor (José Luis López Vázquez) no Festival de Chicago (1972).
Mellor Director, Mellor Guión, Mellor Actor, Mellor Actor de Reparto para o Círculo de Escritores Cinematográficos (1972).
CONTANDO LOS DÍAS é unha comedia romántica transmedia en formato vertical que conta, con humor e tenrura, o inicio da relación entre Ana e Claudia. Unha historia próxima que amosa como o cotián se converte no escenario perfecto para explorar o amor, as emocións e as contradicións da vida diaria.
A primeira tempada consta de 34 episodios, cada un deles é un reel autoconclusivo pensado inicialmente para Instagram, mais tamén con presenza en TikTok e YouTube. Unha nova forma de contar historias, con textos, audios, stickers, GIFs, fotos, videos, emojis… Unha experiencia multiplataforma na que a audiencia interactúa e forma parte da historia.
*Nomeada a Mellor Web Serie nos Premios Mestre Mateo (2026).
Nomeada a Mellor Creación en Nuevos Medios nos Premios ODA (2025).
Seleccionada en FECICAM Festival de Cine Emergente de Ciudad Real (2025).
Mellor serie no LESFEST de Lima, Perú (2026).